အဟေ့ꩻငတ်ꩻပါꩻတရာꩻတောႏ

သုခါ ရုက္ခဿ ဆာယာဝ၊ တတော ဉာတိ မာတာ ပိတု။

တတော အာစေရဿ ရညော၊ တတော ဗုဒ္ဓဿနကဓာ။

ငေါဝ်းလင်္ကာႏ

1. သေင်ႏမွူးတန်ဟေ့ꩻ၊ ယာလျားပြေ့ꩻ၊ ရျူႏဟေ့ꩻငါႏမွေးသွူ။

2. မွိုးဖါအဟေ့ꩻ၊ ဆာယပ်ꩻပြေ့ꩻ၊ ရျူႏတေ့ꩻငါႏမွေးသွူ။

3. ဆရာႏအဟေ့ꩻ၊ တငွို့ပြေ့ꩻ၊ ရျူႏတေ့ꩻငါႏမွေးသွူ။

4. ခွန်ဟောဝ်အဟေ့ꩻ၊ ရန်ႏသူႏပြေ့ꩻ၊ ရျုႏတေ့ꩻငါႏမွေးသွူ။

5. ဘုရာꩻအဟေ့ꩻ၊ ဒုက္ခပြေ့ꩻ၊ ရျူႏတေ့ꩻငါႏမွေးသွူ။

သုခါ ရုက္ခဿ ဆာယာဝ

သေင်ႏမွူးသီး ဂွုဏ်ႏအင်္ဂါႏ

1. သက်မွန်အီတာႏ၊ သေင်ႏမွူးဒျာႏ၊ ထေဗာႏ ရာႏ ကောဝ်ႏသွူ။

2. သက်မွန်သီးတာႏ၊ သေင်ႏမွူးဒျာႏ၊ ထေဗာႏ ဟေ့ꩻရျုႏသွူ။

3. လိုꩻဟောဝ် - ကုဲင်ဒျာႏ၊ မခွယ်ꩻဒါႏ၊ ရျုႏဒျာႏ တွာဝင်ꩻသွူ။

ဗွေႏမျတ်ဘုရာꩻစိုး ကျောင်ꩻမဉ်ꩻဖုံႏ

1. ဇေတဝန၊ ခြံတန်ကျ၊ ဟဲ့လွ ဇေႏတဝွန်ႏ။

2. အမ္ဗဝန၊ ခေါ့ꩻခြံကျ၊ ဟဲ့ꩻလွ အမ္ဗဝွန်ႏ။

3. ဝေဠုဝန၊ ဘေꩻကင်ꩻကျ၊ ဟဲ့ꩻလွ မိဂဒါဝုန်ႏ။

4. မိဂဒါဝန၊ တနွိုင်ꩻကျ၊ ဟဲ့ꩻလွ မဟာဝုန်ႏ။

အာႏကွိုꩻသေင်ꩻမွူး

1. လိုꩻအာဖြာꩻငါႏ၊ မွူးယာဒျာႏ၊ အုံဗာႏ သေင်ꩻဟေ့ꩻကို။

2. ဝါးပေါင်ꩻအာငါႏ၊ မွူးဟာတာႏ၊ ဗေင်ႏဒျာႏ သေင်ႏမွူးကို။

3. အရာႏတဲ့အံႏ၊ အကောဝ်ႏအံႏ၊ အုံခံႏ သေင်ႏမွူးကို။

4. သေင်ႏမွူးထိန်ꩻအာ၊ ထီလွိုင်ႏပါ၊ ရျူႏပါတလီꩻယို။

တတော ဉာတိ မာတာ ပိတု

1. ပိုအုံသန္ဓေႏ၊ မွိုးဖာဗွေႏ၊ အွဉ်ႏသေႏ ဗွောမေတ္တာႏ။

2. သန္ဓေႏခြွိုင်ႏသန်ꩻ၊ ယံဖွာꩻလင်ꩻ၊ ဖေႏရင်ꩻ ရက်မေတ္တာႏ။

3. ဖွာꩻမဉ်ႏထွူခါ၊ ခွမ်ꩻထွာထွာ၊ ဖေႏအာ ရက်မေတ္တာႏ။

4. ပိုမဉ်ႏဆော့ဆာ၊ လွုမ်ꩻလာခါ၊ ဖေႏအာ ရက်မေတ္တာႏ။

5. လွေꩻထာꩻယံမွေး၊ ဒဒါစွေး၊ အံႏဟွေး သွဉ်ဖေႏဒျာႏ။

6. ဒေါ့ꩻငေါဝ်းဒါႏစွေး၊ ယံသေစွေး၊ ယံမွေး သွဉ်ဖေႏဒျာႏ။

7. အခိန်ႏလွေꩻကျောင်ꩻ၊ အပ်ဖေႏကျောင်ꩻ၊ ကွိုက်ꩻပေါင်ꩻ သွဉ်ဖေႏဒျာႏ။

8. ကျောင်ꩻတရိပ်ထွုမ်ႏ၊ အံႏအွꩻထွုမ်ႏ၊ လွုပ်ꩻထွုမ်ႏ ကွဉ်ကꩻတာႏ။

9. ယူႏငါႏ ပိုရက်၊ ယံတိုꩻတက်၊ လွုပ်ꩻကျပ်ထွုမ်ႏရီးဗာႏ။

10. တောႏလမ်းချင်ႏခေႏ၊ ဆင်ႏယံပြႏ၊ မာꩻဖေႏ မင်္ဂလာႏ။

11. မွိုးဖာဟေ့ꩻကွေး၊ အုံကွူႏမွေး၊ ရျူႏစွေး သꩻခွꩻငါႏ။

တတော အာစေရဿ

1. တပဲ့တွက်တာႏ၊ ဒါႏပညာႏ၊ ဆရာႏသွဉ်ဖေႏသွူ။

2. အုံပွုံႏ - အုံနယ်ꩻ၊ လွေꩻသဲင်ꩻနယ်ꩻ၊ ယံစွယ်ꩻ သွဉ်ဖေႏသွူ။

3. မအွဉ်ႏကုဲင်ဗာႏ၊ နမ်းတွက်တာႏ၊ ကဒါႏ သွဉ်ဖေႏသွူ။

4. တပဲ့တွက်တာႏ၊ ရန်ႏကင်ꩻဒျာႏ၊ ဆရာႏ ရဲဖေႏသွူ။

5. တိုꩻတက်ခရာႏ၊ ယံတွိုႏဗာႏ၊ ဆရာႏပသာသွူ။

6. ဆရာႏဟေ့ꩻကွေး၊ အုံကွူႏမွေး၊ ရျူႏစွေး သꩻခွꩻသွူ။

တတော ရညော

1. ခွန်ဟောဝ်ဟေ့ꩻဒျာႏ၊ အုံကွူႏဗာႏ၊ လꩻငါႏ လွုမ်းဗဉ်ႏသွူ။

2. လိုꩻကျောင်ꩻ - ခွန်နင်ꩻ၊ ဘေꩻရန်ႏကင်ꩻ၊ ဟော်ခံꩻ ရဲဖေႏသွူ။

3. ရွဉ်ခံꩻဥစ္စာႏ၊ လွုမ်းဗဉ်ႏတာႏ၊ ရာႏဇာႏ ရဲဖေႏသွူ။

4. သက် ဂွုဏ်ႏ သိက္ခာႏ၊ လွုမ်းဗဉ်ႏတာႏ၊ ရာႏဇာႏ ရဲဖေႏသွူ။

5. သွို့ꩻခြံလုဲင်းယာႏ၊ လွုပ်ꩻဟောဝ်တာႏ၊ ရာႏဇာႏ ရဲဖေႏသွူ။

6. သွဉ်ပညာႏတွင်ꩻ၊ ဘေꩻရန်ႏကင်ꩻ၊ ဟော်ခံꩻ ရဲဖေႏသွူ။

7. အုံတရာꩻတွင်ꩻ၊ ဘေꩻရန်ႏကင်ꩻ၊ ဟော်ခံꩻ ရဲဖေႏသွူ။

တတော ဗုဒ္ဓဿနေကဓာ

1. ဘုရာꩻဟေ့ꩻဒျာႏ၊ အုံကွူꩻဗာႏ၊ ချံꩻသာႏမွေးစွဉ်ႏသွူ။

2. တခြိုꩻစွဉ်ꩻဗာႏ၊ လူႏငါဒျာႏ၊ ဥစ္စာႏ တိုꩻပွာꩻသွူ။

3. ဘုရာꩻငေါဝ်းယာႏ၊ မဉ်ႏလွောက်ꩻနာႏ၊ ချံꩻသာႏ ဖြားထံသွူ။

4. ဘုရာꩻဂွုဏ်ႏယို၊ ရွစ်သꩻကို၊ သꩻယို ဗွာဗာႏသွူ။

5. ဘုရာꩻဂွုဏ်ႏထူꩻ၊ ရငါကူꩻ၊ ဉာဏ်ႏထူꩻ ယူႏဖြောင်သွူ။

6. ဝိပဿနာႏ၊ အာႏထွုတ်ဗာႏ၊ ပညာႏ တိုꩻပွာꩻသွူ။

7. ဖြေႏသꩻယံဒါႏ၊ ဘာဝနာႏ၊ ထွာဒျာႏ သꩻအာႏသွူ။

8. အာသဝ - ကိလေႏသာႏ၊ သေ့ꩻသဲင်တာႏ၊ အုံဗာႏတရာꩻသွူ။

#ပအိုဝ်ႏဓမ္မကထိကသွဉ်တန်ꩻ လိတ်ရဲဉ်ႏအမုဲင်(၃)