ငေါဝ်းဆျာꩻထီ၊ ဝွေႏအမျ၊ ဖကုသိုလ်ႏ

ငေါဝ်းဆျာꩻထီ

ဗွေႏစန္ဒာဝရ(နောင်တဗင်)

ဩဗွေႏ နီသွဉ်းသီး ဟန်ႏနီꩻယိုနဝ်ꩻ ရဲင်ꩻဒုံ ကုသိုလ်ႏမင်္ဂလာႏအနေႏ ဗွေႏမတ်ဘုရာꩻ အွဉ်ႏအထျꩻ ပင်ꩻကျွꩻလွဉ် ဗွေႏရဟန်ꩻသံဃာႏ နီသွဉ်းသီး ဒင်ႏရီးရီး ဘုရာꩻအနေကဇာႏတဲင် ထူႏလွေꩻ ဗုဒ္ဓါဘိသေက အနေႏကဇာႏ ကုသိုလ်ႏဗွေႏဩ။

       နဝ်ꩻလွုမ်ꩻမကာႏ ဗွေႏမျတ်ဘုရာꩻ အွဉ်ႏအထျꩻ ကကျွလွဉ်ဒါႏ ဗွေႏရဟန်ꩻသံဃာႏဖုံႏယို နီသွဉ်းသီး ကပ်လူႏဆွုမ်ႏ ဒဲဉ်သွမ်ꩻအိုသွမ်ꩻ ပါတွမ်ႏ ခဲဖွယ် ထီလွံꩻထီခွꩻ၊ ကကျွꩻလွဉ်ဒါႏ လစ်ꩻဖဲ့ꩻသွစ်ꩻရပ် ပွယ်ꩻကျွꩻပရိသတ် နီသွဉ်းသီး စာႏဂဆွုမ်ႏပါ ဒဲဉ်ဟံႏအာဟာရ ထီလွံꩻထီခွꩻ လွုမ်းလွုမ်းကွုမ်ႏကွုမ်ႏ ဗွေႏဩ။

       နဝ်ꩻလွုမ်ꩻမကာႏ နီဗွေႏသီး အုံလင်ꩻအီတာႏ ထာꩻဒါတွမ်ႏမွဉ် စွုံႏစွုံႏလင်ႏလင်ႏ နီသွဉ်းသီး ဒါဖေႏပါဒျာႏ အာသနကုသိုလ်ႏဒါႏန၊ နီသွဉ်းသီးထူႏပါဒျာႏ ဝေယျာဝဇ္ဇကုသိုလ်ႏဗွေႏဩ။

       နဝ်ꩻလွုမ်ꩻမကာႏ နီဗွေႏသီး ကလိုႏရာꩻ သွုံꩻစုဲင်ႏအီ ဖေႏနေးကလꩻ ရေႏရွယ်ႏ သွံꩻ၊ သင်္ကန်ꩻ၊ ကျောင်ꩻ၊ တသီႏ ပစ္စေꩻလစ်ꩻပါꩻတဲင် နဝကမ္မဝတ္ထုဖုံႏတဲ့ ရိုႏရိုႏသေႏသေႏ ကပ်လူႏပါဒျာႏ၊ နီဗွေႏသီးဆꩻငါ ဓမ္မပူႏဇာႏအနေႏ ဝန်ႏတွုံꩻတန်ကို ကသော့ꩻသေꩻခါꩻ ဟူဗွာတခိုး၊ နမ်းမန်ꩻ၊ ဖျောႏထီ၊ သပ်ပျာႏထီ၊ ခေါက်သွယ်ꩻသဲင် စတဲင် တခြိုꩻလူႏဖုံႏယို ရိုႏရိုႏသေႏသေႏ ကပ်လူႏပါဒျာႏ၊ သရဏဂွုဏ်ႏသွံပါ ငတ်ꩻပါꩻသီႏလꩻ ခံႏထူႏ ဆောက်တယ်ႏပါဒျာႏ၊ နီဗွေႏသီး ကရွစ်ဖေႏ အန္တရာယ်ႏကင်ꩻ ပရိတ်တရာꩻတောႏ၊ နီဗွေႏသီး ကသွဉ်ဖေႏ ငေါဝ်းဆုတောင်ꩻ ပွာꩻမေတ္တာႏ ရိုႏရိုႏသေႏသေႏ နီသွဉ်းသီး ဆုတောင်ꩻ ရွစ်လွဉ်ꩻဒျာႏ ဗွေႏဩ၊ နီဗွေႏသီး ကဟော်ꩻဖေႏ အနုမောႏဒနာႏ တရာꩻတောႏ နီသွဉ်းသီး ဓမ္မဿဝန ဘာဝနာႏ ကုသိုလ်ႏအနေႏ နေးထူႏမတ်တောင်ꩻ ကျင်ꩻသွုံꩻလွဉ်ꩻဒျာႏ ဗွေႏဩ၊ နီဗွေႏသီး ကအီႏရွစ် ပူႏဇောႏထဲင်း အန္တရာယ်ႏကင်ꩻ ကမ္မဝါႏဖုံႏတဲ့ နီသွဉ်းသီး ရိုႏရိုႏသေႏသေႏ နေးထူႏ နာႏခံႏပါဒျာႏ ဗွေႏဩ၊ နဝ်ꩻလွုမ်ꩻမကာႏ နမ်းကိုႏတဲင်ႏ ဒွိုႏသွတ်ꩻဖွစ်ꩻဖျိုး၊ လူးတဲင်စာႏဂ၊ လူႏအာႏလူႏရဲင်ꩻ ကာယကုသိုလ်ႏ ဝေယျာဝဇ္ဇ ကုသိုလ်ႏဖုံႏတဲ့ သိုသိုသွင်ႏသွင်ႏ နီသွဉ်းသီး ခွုမ်စံႏ ဆောင်ႏရွက်ပါဒျာႏ ဗွေႏဩ။

       ဟန်ႏသနီꩻယို နီသွဉ်းသီး ကမာꩻဗာႏကုသိုလ်ႏ ကူစွိုး ကူမျိုꩻဖုံႏနဝ်ꩻ လိုꩻချံꩻသာႏ၊ လူႏချံꩻသာႏ မဂ်တရာꩻဖိုလ်ႏဉာဏ်ႏ နိဗ္ဗာန်ႏချံꩻသာႏ နီသွဉ်းသီး ယံဖေႏနေး ကလꩻအီ ယိုꩻယိုꩻဗာႏ အမဲဉ်ႏဗွေႏဩ။

ဆျာꩻထီ

       ဩဗွေႏ ဟန်ႏသနီꩻယို နီသွဉ်းသီး ကမာꩻဗာႏကုသိုလ်ႏ ကူစွိုးကူမျိုꩻ အပွန်းအတာႏနဝ်ꩻ အထျꩻပထမ ဝွေႏဖေႏလွေꩻရီး ခေတ်ယိုခါ ကားလားယိုခါꩻ အောဝ်ႏတအောဝ်ႏတောဝ်း၊ ထင်ႏသျာꩻတထင်ႏသျာꩻတောဝ်း နီသွဉ်းသီး မွိုးဖာနီပါꩻ၊ ဆရာꩻသမာꩻဖုံႏတဲ့နဝ်ꩻ၊ ဖဝကရီးခါ သံသရာႏအဆက်ဆက် တွမ်ႏနီသွဉ်းသီးယို ကမွော့ꩻလွဉ်ဗာႏဖို မွိုးဖာဖူးဝေး ခွိုꩻနွယ်ႏတွမ်ႏ မိတ်ဆွေႏဖုံႏတဲ့နဝ်ꩻ၊ ငါးရုဲင်ꩻသီးဟော်ခံꩻ ယမမင်ꩻ အွဉ်ႏအထျꩻတဲင် ငါးရုဲင်ꩻ, တိရိစ္ဆာန်ႏ၊ ပိတ္တာႏအသူႏရကာယ်ႏ အပါယ်ႏလစ်ꩻပါꩻ သတ္တဝါႏဖုံႏတဲ့နဝ်ꩻ၊ လူꩻကပွေါးဖေႏ နီသွဉ်းသီးနမ်း၊ လူꩻကပွေါးဖေႏ နီသွဉ်းသီးလမ်း၊ လူꩻကကမ်းဖေႏ နီသွဉ်းသီးကျောင်ꩻ၊ လူꩻကစောင်ꩻဖေႏ နီသွဉ်းသီး ဓမ္မာႏရွုံႏ၊ လူꩻကစောင်ꩻဖေႏ နီသွဉ်းသီးရပ်၊ ရုက္ခစိုꩻ၊ ဘုမ္မစိုꩻ၊ အာႏကာႏသစိုꩻ၊ ဓတရဋ္ဌ၊ ဝိရုဠက၊ ဝိရူပက္က၊ ကုဝေရ လူꩻတန်လစ်ꩻပါꩻ လူꩻသီးဟော်ခံꩻ သိကျာꩻမင်ꩻတဲ့နဝ်ꩻ၊ နီသွဉ်းသီးရပ်ယို နီသွဉ်းသီးဝေင်ꩻယို နီသွဉ်းသီးခမ်းထီယို ကထိန်ꩻထွား အုပ်ချွုတ်ဖေႏဒါႏ လိုꩻတန်ဖုံႏ အစိုးရဖုံႏတဲ့နဝ်ꩻ အွဉ်ႏအထျꩻတဲင်ꩻ ၃၁ ဘွုံႏ ကအောဝ်ႏဒါႏ ဝေနယျ ဒုက္ခိတ သုခိတ သတ္တဝါႏဖုံႏ လို့လို့စင်စင် နီသွဉ်းသီး ဖန်းဖေ ဝွေႏဖေႏ ဖြယ်ဖေႏ ဖန်းဖေႏပါဒျာႏ အမျဗွေႏဩ၊ ၃၁ ဘွုံႏ ကအောဝ်ႏဒါႏ ဝေႏနယျ ဒုက္ခိတ သုခိတ သတ္တဝါႏဖုံႏ နေးငီꩻငီꩻ ထူႏတွာတွာ နီသွဉ်းသီးကုသိုလ်ႏ အပွန်းအတာႏ သာႏဓုသွော့ꩻ သွံလဲင်ႏ၊ သာႏဓုမဉ်ႏထွူ နမ်းသꩻနီပါꩻ ယံကခြိုင်ႏသန်ꩻ ယံကချံꩻသာႏ ယံကတိုꩻတက် ယံကအောင်ႏမျင်ႏ ယံကထွန်ꩻကာꩻ ယံကစီꩻပွါꩻ ပငါပရာ စွုမ်ႏဖြာꩻဖြာꩻ စွုမ်ႏပါꩻပါ ဗွေႏသီးဩ။